Тігін фабрикасы. Темір тордың арғы жағында жұмыс үстіндегі әйел-тұтқынның образы бейнеленген. Әйелдерді үйінен киіп келген киімдерімен лагерге жөнелтетін. Біреуі жазғы көйлекте болса, екіншісі халат жамыла салған. Сондықтан да тігін фабрикасы ашылғаннан кейін олар алдымен өздеріне бір қабат киім әзірледі. Кейінірек Ұлы Отан соғысы жылдарында солдаттар үшін киім-кешек тікті. Әрбір әйел күніне жұмыстың белгілі бір нормасын орындауы керек еді. Норманы орындамаған жағдайда оларды жазалайтын: нан бермей қоятын немесе аштықтан да қорқыныштысы – хат жазуға рұқсат бермейтін. Сондықтан тұтқындар күніне 16 сағат жұмыс жасайтын. Мәскеу мен Ленинградтан тапсырыс көп болатын. Лагерде сондай-ақ бір ғана шам жанып тұратын кесте тігетін цех жұмыс жасайтын. Көптеген әйелдердің сол цехта жүргеннен көздерінің көру қабілеті нашарлады. Бірақ соған қарамастан олар жұмыстарын адал орындады. АЛЖИР-дің кейбір тұтқындары бостандыққа шыққаннан кейін өз жұмыстарын дүкендердің сөрелерінен кездестіретін.

15​ қараша күні​ маман Бекжамал Жалғасова «Астана» медициналық университетінің І-курс студенттері үшін Сұлтан Бейбарыстың 800 жылдығына арналған​ «Мысырдың ұлы билеушісі»​ дәрісін​ оқыды.​ Мақсаты:​ Сұлтан Бейбарыстың​ өмірі мен қызметін насихаттау.

Дәріс 1937-1938 жылдары Қазақстанның көрнекті мемлекет және қоғам қайраткерлеріне жалған айып тағылып, жазықсыз жазаланғаны және қазақтың ғылымы мен мәдениеті орны толмас шығынға ұшырағаны, сонымен қатар,​ олардың әйедері «АЛЖИР» лагерінде мерзімдерін өтегені туралы болды.

2023 жылы 27 қазан күні «Бірлескен мұражайлар дирекциясы» МКҚК қызметкерлері Қазақстан музейлері қызметкерлерінің І конгресіне қатысты. Реставрациялық алаңда кәсіби мамандар музей заттарын консервациялау, реставрациялау жұмыстарындағы теориялық, тәжірбиелік-әдіснамалық мәселелермен бөлісті. Аталмыш шара өзара тәжірбие алмасу арқылы музей мамандарының кәсіби біліктілігін арттыру мақсатында өткізілді. Семинар барысында музей мәселелерінің теориялық тұсымен ғана емес, шеберханалық жұмыстарымен танысуға мүмкіндік алды. Конгрестің мақсаты - қазіргі музей ісінің жетістіктерін, тәжірибелері мен нәтижелерін насихаттау, музей ісі мен музейлер қызметін заманауи бағытта ілгерілету, музейлердің ғылыми-зерттеу, мәдени-білім беру қызметін жетілдіру.

Мемлекеттік сыйлықтың лауреаты, ақын Несіпбек Айтұлы 2023 жылдың 16 қазан күні дүниеден өтті. Несіпбек Айтұлы Тәуелсіз еліміздің мәдени-рухани өркендеуіне зор үлес қосып, еңбек еткен Мәдениет пен өнер саласының қажырлы қайраткері еді. Астана қаласының рухани дамуына өлшеусіз еңбек етті. Астана қаласының Бірлескен мұражайлар дирекциясының Сәкен Сейфуллин мұражайында ұзақ жыл кызмет етіп, абыроймен атқарып келді. Несіпбек Айтұлының жаткан жері жайлы, топырағы торқа болсын. Отбасына, жақындарына қайғырып көңіл айтамыз.

26 шілде күні экскурсия жүргізуші Бақтыгүл Саханова қылмыстық жазаларды және өзге де қылмыстық-құқықтық көмек, сонымен қатар қылмыстық жазасын өтеп шыққандарға және де басқа адамдарға әлеуметтік көмек ұйымдастыру бойынша мекемелерге қолдау көрсету аясында Қылмыстық-атқару жүйесі комитеті Астана қаласы бойынша Қылмыстық-атқару жүйесі департаментінің «ЕЦ-166/10» мекемесінде «Ұрпақтар ұмытпайды» көрмесін ұйымдастырып, дәріс оқыды. ХХ ғасырдың 30-50-жылдарындағы қайғылы қасірет пен оқиғаларды есте сақтап, тоталитарлық жүйенің жазықсыз жапа шеккен құрбандарына қатысты әділеттілікті бұрынғыдай қалпына келтіру, өсіп келе жатқан ұрпақты патриоттық сезімге және адамгершілікке тәрбиелеу, музей қызметін насихаттау мақсатында ұйымдастырылған көрмеде «АЛЖИР» тұтқындарының фотосуреттері мен архивтік құжаттары ұсынылды.